TONA NI DAINANG

Borungku! Molo magodang ho, lao ho tu bagas ni iboto mu.

Unang hundul ho, jala gabe edamu mambuat aek si inumonmu. Unang hundul ho molo dipauli piringmu tu dapur.

Molo mangalompa edam di dapur, dapothon tu dapur, jala sunghun: “ Namangalompa do ho eda?, Namanuci aha eda?, Dia hu lompa,  dia hu sapu”, nimmu rupani, atik pe holan di bibir do i, alai mansai suman begeon.

Boto inang hundulan mu songon boru ho! Sanggap ho tu iboto mi, sangap tu eda mi (boru ni halak do i jala boru ni raja), malo ho mambuat rohana, adu na di ro ha na i.

Boru ku! Molo lao ho tu natorop manang tu sada ulaon, dibereng ho angka iboto mu (hula-hulamu), pintor hatop lojong (mangadu) manurdukkon tangan mu laho manjalang, jala do: “Horas ito, eda, tulang, nantulang”, jala sunghun: Nunga minum hamu ito (tulang)? Aha baenonku? Lului aek diinumon, isarana kopi manang air mineral kemasan. Nangpe holan pemanis ni bibir, alai mansai tabo begeon jala arga do nang i.

Boru ku! Molo diberengho hula-hulamu (ibotomu,edamu, tulang nang nantulang mu) jongjong, hatop adu mangalaputi mangalului jala patudu hundulan na.

Boru ku! Molo lao ho marhuta sada tu huta ni hula-hulamu, sotung mangeal ho (tangan kosong), sabugkus  pe roti marie dapot ho, boan ma. Adong tingki mu, baen ma sasagun i.

Boru ku! Ingkon ingoton mu ma i molo matua au, iboto mi ma amang mu, jala eda mi ma inong mu, songon singkat nami haduan.

Boru ku! Molo ro tamue tu bagasmu tung ise pe i, pintor baen ma tapian (aek siinumonna), so jolo dipangido. Autsura lobi sian tingki na gabe lumeleng nasida dijabu, laho ma ho tu dapur, pature sipanganon. Atik pe bulung gadong di gaor ho dohot gambas. Atik na naeng marhuta sada do nasida, pahembang lage tiar i boru ku, baen podoman na, ido ingkon ulahononmu songon ina ‘parsangkalan so ra mahiang jala partataring na so ra mittop, paramak so ra balunon.

Boru ku! Gabe ina ma ho, lambas ho mar roha, jala toruk marroha (parbahul-bahul na bolon )

Boru ku! Marbisuk ho molo marsahit boru mi (termasuk suami atau anaknya), tingkir jala boan pisang I (buah-buahan), alai molo songon na posa sahit na i lompa jala boan dengke si mudur-udur i.

Unang heal ho boru ku mangeal tu jabu ni boru mi, ai sa sisir pisang dapot ho di dalan i, boan ma.

Boru ku! Molo adong na masa manang ulaon di boru mi (Keluarga ni hela manang simatua ni boru mi), halaputi ulaon i boru ku, asa tarida boru ni raja ho. Marsiajar jala marpanungkun ho tu natua-tua aha do si baen on manang siboanonmu na hombar tu si.

Mauliate ma di angka poda na uli on tutu.

Tung mansai marparbue do on diragam ni partingkian, tung pe hatop muba-uba.

Taajarhon ma tu angka ianakhonta, jala taparsiajari ma on di parngoluonta.

Horas… Horas… Horas….!